„НА БАТЕРИИ ЛИ РАБОТИ?“ – ВСЕЛЕНСКА АВАНТУРА СО „ЅВЕЗДЕНА ЏУНГЛА“

Знаеш ли што ти треба за да стигнеш до Вселената? Прво треба да ја прочиташ „Ѕвездена џунгла“ и да знаеш да сонуваш. Тоа ти е исто како да положиш испит за космонаут. Те предизвикуваме да го прочиташ следното поглавје и не заборавај – полетувањето на ракетата е во четврток!

Мене ми беше редот да читам на глас. Само што почнав, едно девојче и едно момче од нигде никаде се појавија среде собата. Како токму во тој миг да се создале. Со подотворени усти се загледавме во нив.

– Здраво, момци, еве сме, дојдовме! – со певлив глас, весело викна девојчето.

– Што сте се зачудиле толку? Нели сношти ветивме дека на оваа страница ќе се сретнеме? – се изненади момчето. Ја галеше онаа, птицана, застаната врз неговото рамо. А таа, мангупка една, клепаше со очите божем е сосема рамнодушна на нас. Како првпат да нѐ гледа. Ја меркав подоко. Само ако пак се изглупира, ги стегнав тупаниците, овој пат нема да куртули.

– Асја, не дозволувај да те испровоцира – ме предупреди Едан. Знае дека сум понекогаш злопамтило и дека лесно можам да избувнам. И тој не е нешто поарен, ама сега беше поприбран од мене.

– Јас сум Стела – прво ни пријде девојчето. Имаше венче со ѕвездички во косата. Светеа како витински.

– На батерии ли работи? – се загледав во него.

– Кој? Венчето? – си го поднамести. – Не. Небесни ѕвезди се. Сама си ги собрав ноќва – зборуваше како да потпевнува.

– Како да не, сама си ги собрала – ѝ се потсмеа брат ми.

– Ѕвездите не се школки на плажа, па да можат тукутака да се собираат. Забележав дека е напнат. Значи, или воопшто не му се допаѓа оваа Стела или пак обратно, веднаш му се допадна и сака тоа да го прикрие. Ги познаваме ние девојчињата. Обично штом ќе сфатат дека ни се допаѓаат креваат нос, се прават важни.

– Во книгите сѐ е можно – пристапувајќи ни, момчето спокојно возврати на претходната зајадлива забелешка.

– Самите ќе се уверите. Птицата на неговото рамо сѐ уште клепаше со очите, речиси незаинтересирано, како овој разговор да ѝ е ептен здодевен. Уште што не се проѕевна. Ама јас знаев дека се преправа, итрицата.

– Невоспитан ти е папагалот. Не си го издресирал како што треба – почувствував дека мојата лутина кон птицата преминува и кон него.

– Не е дресирана и не е папагал – добронамерно се насмевна момчето.

– Тогаш кажи од кој вид е. Можеби какаду, турако, квезал, тукан, иако баш и не личи на нив, многу чудно изгледа. На која фамилија птици ѝ припаѓа? – Едан сѐ уште беше напнат.

– На ниедна птичја фамилија и на ниту еден вид. Таа едноставно е Уни.

– Демек, уникатна е? – не попушташе Едан.

– Или можеби универзална? – фрлив непријателски поглед кон неа.

– Да не е универзумска? – повторно брат ми, со подбивен тон.

– Што сте се накострешиле толку? – потпевна Стела. – Нѐ повикавте да се дружиме, а глеј како нѐ дочекувате. Луди авантури нѐ чекаат, ехеееј! – ја заниша весело главата. Ѕвездичките од венчето ѕвонливо затрепкаа.

– Си дојдовте самоповикани – не можев да премолчам.

– Во заблуда си – палаво ми го размавта показалецот пред очи. – Кој ја чита книгава, а? Вие нас нѐ читате, или ние вас? Ај размисли до следната средба.

Уни го отвори клунот да се вмеша, па се откажа. И подобро. Ќе беше беља ако пак ме нас’скаше.

– Најдобро е да размислат дали воопшто ќе има следна средба – момчето ѝ се обрати на Стела, а потоа и нам: – Единствено од вас зависи – нѐ погледна сериозно, дури и строго. – Сега само ви се претставивме. Ако ви е до дружба со нас, продолжете со читање. Си одиме! – даде знак со крената рака.

– Ч. ч., другарчиња! – гракна птицата пред да ги снема тројцата.

– Каков глупав поздрав наместо чао, чао! – профрчив.

– Кога побрзо ѝ станавме другарчиња?

– Ма пушти ја! Но оние двајца мене ми се океј. Ти што мислиш?

– Едан очигледно беше заинтересиран за дружење со нив.

– Особено Стела ти е океј, нели? – го подбуцнав.

– И тебе ти е, признај – се поднасмевна.

– Немам ништо против двајцата. Само Уни ми е проблематична. Сепак, вреди да се подружиме.

– Ако нешто запне, или ни се видат досадни, лесна работа. Полицата со книги не им бега. Ќе ги вратиме од каде што дојдоа.